碩果僅存的大排檔 - 愛文生
男人的浪漫，可能就是三五知己坐在街邊的露天大排檔，不論環境，享受鑊氣小炒，無拘無束的碰碰啤酒杯，風花雪月一番。奈何香港寸金尺土，加上政府管制，這類露天大排檔已近乎絕跡。
之前聽朋友説在深水埗還有一兩間碩果僅存的排檔，當然要跟他去揾食揾食啦！
出了深水埗地鐵站，步行約10分鐘到荔枝角道。在一條橫街中，想不到還可以見到這種露天大排檔，看著大廚拿著燒得通紅的大鐵鑊將餸菜來回拋起，鑊下爐火燒得猛烈發出洪洪聲響。雖然坐在街邊，但別有一番風味，讓我們享受一下那種不拘小節的市井豪邁。
我們一行三人，叫了兩道小菜一碟乾炒牛河送吓啤酒。
黑椒鹹豬手，大大隻以鐵板盛載，上枱時熱辣辣冒著煙吱吱在響，眼見差不多枱枱都叫一隻，相信應是這裡的招牌菜吧。
切開果然份量十足，豬皮不太肥，Q軟彈牙，充滿骨膠原；內裡啖啖肉，肉質鹹香，配上微辣黑椒汁同墊底焦香的洋蔥，十分惹味。
這道雖不是甚麼特色菜，但勝在大件抵食，做得軟硬適中，味道得宜，送啤酒一流！
油泡鮮魷，選用新鮮魷魚，油泡火喉控制得剛剛好，肉質嫩滑，QQ軟軟的，配埋伴炒的韭黃香芹，帶出了魷魚的鮮味。
現時一般食市多數選用急凍魷魚，貪其存貨方便，但口感跟新鮮魷魚完全不可相提並論。這道菜較有驚喜，平凡中見真章。
乾炒牛河，在這類鑊氣小炒大排檔，一定要試乾炒牛河，因通常一定炒得夠乾身夠鑊氣。大家一坐低已異口同聲叫了一碟，唯是日河粉差不多沽清，剩下的不夠炒一碟份量，侍應提議可撈米粉一齊炒，我們當然唔會放過啦。
可能我們期望過高，當牛河端來時確實有點失望，因望見顔色和心中形象有點差距，而食落雖然都算有鑊氣亦不太油，但味道就不夠濃；河粉亦未炒勻有部份完全未上色，不知和撈了米粉一起炒有沒有關係呢？
乾炒牛河看似簡單，但要炒得唔油膩色澤夠均勻，其實是很考大廚的功架，希望今次是偶一失手，期望下次會好一點吧。
從網上資料得知原來這裡已經營近六十年，現時已傳至第三代接棒，衷心希望他們能繼續努力經營，讓香港特色的地道大排檔文化可一直承傳下去。
古家私房菜
本肥仔廚藝不算精湛，勝在有三心兩意－－用心、耐心、貼心、創意同心意，見到朋友食得開心嘅同時，我亦覺高興！
Search